ការងារយើង៖ កម្មវិធីអាហារូបករណ៍សិល្បៈអមតៈ អាន ចនផន

កម្មវិធី៖ អភិវឌ្ឍន៍សិល្បៈ
គោលដៅ៖ មនុស្សវ័យក្មេងដែលកំពុងសិក្សា ឬធ្វើការក្នុងវិស័យសិល្បៈ

untitled-1

កម្មវិធីអាហារូបករណ៍សិល្បៈអមតៈ អាន ចនផន ជួយ​ដល់​អ្នក​ដែល​មាន​ទេព​កោសល្យ​ដើម្បី​បន្តអាជីព​ការងាររ​បស់​ខ្លួន​ក្នុង​វិស័យ​សិល្បៈ​។ កម្ម​វិធី​អាហា​រូបករណ៍​នេះ ជួយ​ដល់​សិស្សានុ​សិស្ស​អភិវឌ្ឍ​ជំនាញ​ភាព​ជា​អ្នក​ដឹកនាំ ការ​គ្រប់​គ្រង​ហិរញ្ញ​វត្ថុ ការ​រៀប​ចំ​ផែន​ការ​អាជីព​ការងារ និង​ផ្តល់​ជូន​កញ្ចប់​ថវិកា​ដើម្បី​ចំណាយ​លើ​ថ្លៃ​ចូល​រួម​វគ្គ​បណ្តុះ​បណ្តាល និង​ចំណាយ​ផ្សេងៗ​ទៀត​ផង។

អាហា​រូបករណ៍​នេះ ផ្តល់​ជូន​សិស្ស​សិល្បៈ និង​សិល្បករ​វ័យ​ក្មេង​ដែល​​បង្ហាញ​ពី​ទេពកោសល្យ និង​ការជំរុញ​ទឹកចិត្ត​ដើម្បី​អភិវឌ្ឍន៍​ជំនាញ​សិល្បៈ​របស់​ខ្លួន – អាទិភាព​ត្រូវ​បាន​ប្រគល់​ជូន​បេក្ខជន​ដែល​ពុំសូវ​ទទួល​បាន​ឱកាស​នេះ។

យើងបានផ្តល់អាហារូបករណ៍ដល់បេក្ខជនប្រហែល ១១០ រូបហើយ ចាប់តាំងពីកម្មវិធីអាហារូបករណ៍នេះបានចាប់ផ្តើម។ ឆ្នាំមុនបេក្ខជន ១០ រូបបានទទួលអាហារូបករណ៍សិល្បៈអមតៈអានចន ផន ហើយពួកគេទទួលបានការគាំទ្រលើការសិស្សាទាំងក្នុង និងក្រៅជំនាញសិល្បៈ។

​បើក​ទទួល​ពាក្យ​​ស្នើ​សុំ​អាហារូបករណ៍សម្រាប់ឆ្នាំ ២០២៣!

​បើក​ទទួល​ពាក្យ​​ស្នើ​សុំ​អាហារូបករណ៍​​ពីខែមីនា  រហូតដល់ថ្ងៃទី៣១ ខែឧសភា ឆ្នាំ២០២២។ បន្ទាប់​ពី​ឆ្លង​កាត់​ដំណាក់​កាល​ជ្រើសរើស សិស្សដែលនឹងទទួលបានអាហារូបករណ៍ នឹងត្រូវ​ប្រកាស​នៅ​ខែ​កញ្ញា ឆ្នាំ២០២២។

សូមទាញយកព័ត៌មាន និងពាក្យស្នើសុំពីប្រអប់ខាងស្តាំដៃ បំពេញរួច សូមផ្ញើទៅកាន់ sormanak@cambodianlivingarts.org ឬទំព័រហ្វេសប៊ុក En Sormanak

ឬអាចមកទទួលពាក្យស្នើសុំនៅការិយាល័យអង្គការសិល្បៈខ្មែរអមតៈ (128G9, Sothearos Blvd, Phnom Penh, Cambodia)

បេក្ខជនជាស្ត្រី ​ជនពិការ ជនជាតិភាគតិច ឬអ្នកមកពី​សហគមន៍​សម្លេង​តិច ត្រូវបាន​លើកទឹកចិត្ត​ឲ្យដាក់ពាក្យ​ស្នើសុំអាហារូបករណ៍។

សម្រាប់ជំនួយបន្ថែម សូមទាក់ទងមកកាន់ក្រុមការងាររបស់យើង តាមរយៈលេខទូរស័ព្ទ 010 941 224 ឬ sormanak@cambodianlivingarts.org

ពីថ្ងៃចន្ទ-សុក្រ (៨ព្រឹក-៥.៣០ល្ងាច)។

២០២១ គឺជាខួប១០ឆ្នាំនៃកម្មវិធីអាហារូបករណ៍សិល្បៈអមតៈ អាន ចនផន។ តាំងពីឆ្នាំ២០១១មកមានមនុស្ស១០០នាក់ជាងបានទទួលអាហារូបករណ៍ពីកម្មវិធីនេះ ដែលការគាំទ្រមានប្រាក់ឧបត្ថម្ភការសិក្សាដែលទាក់ទងនឹងអាជីពការងាររបស់ពួកគេក្នុងវិស័យសិល្បៈ និងការគាំទ្របន្ថែមសម្រាប់ការអភិវឌ្ឍខ្លួននិងអាជីពអំឡុងពេលទទួលបានអាហារូបករណ៍។

ក្នុងអំឡុងខួប១០ឆ្នាំនេះ សិល្បៈខ្មែរអមតៈនឹងផ្តល់មូលនិធិដល់ការធ្វើរង្វាយតម្លៃឯករាជ្យចំពោះកម្មវិធីអាហា-រូបករណ៍នេះ ដើម្បីពិនិត្យមើលលទ្ធផលនៃកម្មវិធីកន្លងមក ក៏ដូចជាទទួលបានអនុសាសន៍សម្រាប់អភិវឌ្ឍកម្មវិធីបន្ថែម ដើម្បីឆ្លើយតបនឹងបរិបទនៃសិល្បករនិងអ្នកធ្វើការក្នុងវិស័យវប្បធម៌នាពេលបច្ចុប្បន្ននិងអនាគតក្នុងប្រទេសកម្ពុជា។


ជួបជាមួយសិស្សអាហារូបករណ៍សិល្បៈអមតៈអានចន-ផន ឆ្នាំ២០២៣

1.1—mao-sreychhnas—

ម៉ៅ ស្រីឆ្នាស់


ម៉ៅ ស្រីឆ្នាស់ ជាអតីតមន្រ្តីជាប់កិច្ចសន្យានៃមន្ទីរវប្បធម៌និងវិចិត្រសិល្បៈខេត្តប៉ៃលិន។ សព្វថ្ងៃ គាត់ជានិស្សិតកំពុងសិក្សាជំនាញដឹកនាំរឿង (របាំបុរាណ) នៅសាកលវិទ្យាល័យភូមិន្ទវិចិត្រសិល្បៈ ហើយស្នើសុំអាហារូបករណ៍ដើម្បីគាំទ្រការសិក្សាលើជំនាញនេះ។ គាត់រំពឹងថា បន្ទាប់ពីបញ្ចប់ការសិក្សារយៈពេល៤ឆ្នាំ គាត់នឹងយកជំនាញនេះទៅបម្រើការនៅមន្ទីរវប្បធម៌និងវិចិត្រសិល្បៈខេត្តប៉ៃលិន ដើម្បីពង្រឹងនិងអភិវឌ្ឍរាល់តម្រូវការរបស់មន្ទីរខេត្ត មិនថាការដឹកនាំ ឬការសម្តែង អោយកាន់តែប្រសើរឡើង។ ម៉្យាងវិញទៀត គាត់ចង់ផ្សព្វផ្សាយ ចែករំលែកដល់យុវជនខេត្តដើម្បីអោយពួកគាត់មានឱកាសសិក្សាទម្រង់ក្បាច់បុរាណនេះកាន់តែច្បាស់។

2.2—ping-sreynoch—

ពីង ស្រីណុច


ពីង ស្រីណុច បានបញ្ចប់ការសិក្សាបរិញ្ញបត្រជំនាញបុរាណវិទ្យានៅសាកលវិទ្យាល័យភូមិន្ទវិចិត្រសិល្បៈ ហើយសព្វថ្ងៃជាជំនួយការអគ្គនាយកដ្ឋានបច្ចេកទេសនៃក្រសួងវប្បធម៌និងវិចិត្រសិល្បៈ។ គាត់ស្នើសុំអាហារូបករណ៍ដើម្បីសិក្សាភាសាអង់គ្លេសទូទៅ ដែលនឹងបង្កភាពងាយស្រួលក្នុងការទំនាក់ទំនងការងាររបស់គាត់ជាមួយអង្គការដៃគូក្នុងប្រទេសនិងអន្តរជាតិ ដោយគាត់នឹងអាចអាន ស្រាវជ្រាវព័ត៌មានផ្សេងៗ ពិសេសចំណេះដឹងសិល្បៈពីប្រទេសនានា ដើម្បីយកមកបម្រើអោយផលប្រយោជន៍ជាតិទៅថ្ងៃមុខ។ គោលដៅរបស់គាត់គឺអភិវឌ្ឍខ្លួនអោយកាន់តែមានសក្តានុពល មានចំណេះដឹងខ្ពស់លើវិស័យសិល្បៈនិងវប្បធម៌ជាតិ អាចស្វែងយល់ពីវប្បធម៌ប្រទេសដទៃដើម្បីជាយានក្នុងការអភិវឌ្ឍនិងផ្សព្វផ្សាយវប្បធម៌កម្ពុជានៅលើសកលលោក។

2.2—hul-kanha–

ហ៊ុល កញ្ញា


ហ៊ុល កញ្ញា ជាសិល្បករឯករាជ្យផ្នែកសិល្បៈចក្ខុទស្សន៍ នៅខេត្តសៀមរាប។ គាត់ស្នើសុំអាហារូបករណ៍សិក្សាបរិញ្ញាបត្រជំនាញអក្សរសាស្រ្តអង់គ្លេស ព្រោះវាអាចជួយអោយគាត់អាចបន្តការសិក្សាអភិវឌ្ឍជំនាញសិល្បៈរបស់គាត់អោយកាន់តែមានសមត្ថភាពមួយកម្រិតទៀត ហើយការទាក់ទងជាមួយស្ថាប័នអន្តរជាតិកាន់តែមានភាពប្រសើរឡើង។ គាត់ក៏មានគោលបំណងចង់ក្លាយជាអ្នកអប់រំបណ្តុះបណ្តាលលើវិស័យសិល្បៈមួយរូបនាពេលអនាគតផងដែរ។ គាត់នឹងត្រូវខំពង្រឹងការសិក្សាស្រាវជ្រាវបន្ថែមទៀតទាំងជំនាញស្នូលនិងជំនាញទំនាក់ទំនងអោយកាន់តែល្អ ដើម្បីក្លាយជាបុគ្គលមួយរូបអាចធ្វើការងារបម្រើវិស័យសិល្បៈវប្បធម៌ពេញចំណេះដឹង។

3.3—roth-sreypa–

រដ្ឋ ស្រីប៉ា


រដ្ឋ ស្រីប៉ា ជាជនជាតិដើមកួយ នៅខេត្តព្រះវិហារ។ គាត់ស្នើសុំអាហារូបករណ៍សិក្សាបរិញ្ញាបត្រជំនាញទំនាក់ទំនងអន្តរជាតិ ដើម្បីជួយអោយជំនាញភាសាអង់គ្លេសនិងជំនាញទំនាក់ទំនងរបស់គាត់ជាមួយស្ថាប័នជាតិនិងអន្តរជាតិកាន់តែប្រសើរ។ គោលដៅរបស់គាត់គឺក្លាយជាអ្នកច្នៃម៉ូតដ៏សំបូរបែបម្នាក់ដែលអាចទំនាក់ទំនងជាមួយដៃគូរសហការទាំងក្នុងនិងក្រៅប្រទេសដើម្បីលើកកម្ពស់ ការរក្សាសម្លៀកបំពាក់ច្នៃម៉ូតប្រពៃណីខ្មែរ រួមជាមួយការច្នៃប្រឌិតទាន់សម័យ ស្របទៅតាមតម្រូវការប្រជាជនក្នុងស្រុកនិងក្រៅស្រុក ដែលជាកាច្នៃប្រឌិតម៉ូតប្លែកៗ ហើយគិតគូរពីការប្រើប្រាស់ក្រណាត់និងវត្ថុធាតុដើមធម្មជាតិដែលមិនប៉ះពាល់ដល់បរិស្ថាន ជាពិសេសគាត់មានគោលដៅបង្កើតជាអាជីវកម្មតូចមួយដើម្បីផ្តល់ការងារដល់ស្ត្រីជនជាតិដើមភាគតិចដែលមានជីវភាពខ្សត់ខ្សោយនិងក្មេងស្រីដែលបោះបង់ការសិក្សាដើម្បីផ្តល់ជាប្រាក់កម្រៃផ្គត់ផ្គង់គ្រួសារតាមរយៈការផ្តល់ជាការងារក្នុងសិប្បកម្មច្នៃម៉ូត។

2.2—hout-sakkanitha—

ហ៊ួត សុខកន្និដ្ឋា


ហ៊ួត សុខកន្និដ្ឋា មកពីខេត្តបន្ទាយមានជ័យ សព្វថ្ងៃជានិស្សិតបរិញ្ញាបត្រសិក្សាជំនាញដឹកនាំរឿង ផ្នែកល្ខោននិយាយ នៅសាកលវិទ្យាល័យភូមិន្ទវិចិត្រសិល្បៈ។ គាត់ស្នើសុំអាហារូបករណ៍សិក្សាបរិញ្ញាបត្រជំនាញអក្សរសាស្រ្តអង់គ្លេស។ នៅថ្ងៃអនាគត គាត់ចង់ក្លាយជាអ្នកដឹកនាំរឿងម្នាក់នៅក្នុងទម្រង់សិល្បៈទស្សនីយភាពល្ខោននិយាយនិងភាពយន្ត។ គាត់មើលឃើញខ្លួនឯងជាចំណែកមួយដែលអាចចូលរួមផ្សព្វផ្សាយអភិវឌ្ឍន៍ទៅលើវិស័យនេះអោយកាន់តែប្រសើរ តាមរយៈការច្នៃប្រឌិត ដើម្បីដើរអោយទាន់សម័យកាលបច្ចុប្បន្ននិងអនាគត ព្រមទាំងចែករំលែកនិងចូលរួមកសាងភាពធន់សម្រាប់អ្នកបន្តវេនជំនាន់ក្រោយៗនិងផ្តល់ឱកាសក្នុងការចូលរួមបញ្ចេញសមត្ថភាពតាមការសម្តែងនិងការនិពន្ធផ្សេងៗ។ អាហារូបករណ៍នេះនឹងជួយជ្រោមជ្រែងដល់ការសិក្សារបស់គាត់សព្វថ្ងៃបានរលូននិងសម្រេចគោលដៅ ដោយអាចប្រើភាសាអង់គ្លេសជាទន់និងងាយស្រួលក្នុងការស្រាវជ្រាវ ក៏ដូចជាទំនាក់ទំនងនិងផ្សព្វផ្សាយផងដែរ។

5.5—rin-kakvey–

រិន កវី


រិន កវី ជាគ្រូភ្លេងឯកជនបង្រៀនភ្លេងពិណពាទ្យ នៅខេត្តបន្ទាយមានជ័យ។ គាត់ស្នើសុំអាហារូបករណ៍ដើម្បីសិក្សាបន្ថែមជាមួយគ្រូឯកជននៅខេត្តសៀមរាប លើជំនាញភ្លេងកន្ទាំមីង រួមមានឧបករណ៍ស្រឡៃ គងពាទ្យ ស្គរជ័យ និងគងមោង។ អាហារូបករណ៍នេះនឹងជួយអោយគាត់បានហាត់រៀនភ្លេងទ្រាំមីងដែលជិតនឹងបាត់បង់ទៅហើយ ហើយអាចអោយគាត់ពាំនាំវង់ភ្លេងនេះមកបង្កើត បណ្តុះបណ្តាលដល់យុវជនក្នុងខេត្តបន្ទាយមានជ័យ ព្រោះសព្វថ្ងៃនេះវង់ភ្លេងទ្រាំមីងបានបាត់បង់ហើយក្នុងខេត្តបន្ទាយមានជ័យ។ ក្នុងថ្ងៃអនាគត គាត់ចង់ក្លាយខ្លួនជាគ្រូភ្លេងបុរាណខ្មែរ និងជាអ្នកស្រាវជ្រាវភ្លេងបុរាណ តាមនិស្ស័យពីកំណើតដែលស្រឡាញ់ពេញចិត្ត។

6.-6–poeurn-ponlea—

ពឿន ពន្លា


ពឿន ពន្លា ជាអ្នកផលិតវីដេអូនិងរចនារូបភាពនៅអង្គការល្ខោនគំនិត ក្នុងខេត្តបាត់ដំបង។ គាត់ស្នើសុំអាហារូបករណ៍ដើម្បីសិក្សាភាសាអង់គ្លេសទូទៅ ព្រោះភាសាអង់គ្លេសរបស់គាត់នៅមានកម្រិត។ គាត់តែងតែមានទំនុកចិត្តចំពោះស្នាដៃការងាររបស់គាត់ ហើយក៏មានឱកាសជាច្រើនដែលហុចអោយគាត់ក្នុងការអភិវឌ្ឍលើចំណេះដឹងនិងជំនាញដែលគាត់មាន តែពេលខ្លះគាត់បានបាត់បង់ឱកាសទាំងនោះដោយសារចំណេះដឹងភាសាបរទេសរបស់គាត់នៅមានកម្រិត។ ម៉្យាងវិញទៀត ការងារដែលគាត់ធ្វើសព្វថ្ងៃទាក់ទងនឹងសហគមន៍ ជួយលើកស្ទួយទៅដល់ស្រ្តីងាយរងគ្រោះ តាមរយៈសិល្បៈល្ខោននិយាយ ដែលគាត់ជាផ្នែកមួយដែលជួយអោយការងារនេះដំណើរការនិងទទួលបានជោគជ័យតាមរយៈការផលិតវីដេអូនិងការផ្សព្វផ្សាយនានា។ ដូច្នេះ ភាសាអង់គ្លេសដើរតួជាផ្នែកមួយយ៉ាងសំខាន់នៅក្នុងគម្រោងនិងការអនុវត្តផែនការរបស់គាត់។

8.8—phat-phyrom—

ផាត ភីរម្យ


ផាត ភីរម្យ ជាមន្ត្រីការិយាល័យសិល្បៈភាពយន្តនិងផ្សព្វផ្សាយវប្បធម៌នៃមន្ទីរវប្បធម៌និងវិចិត្រសិល្បៈខេត្តឧត្តរមានជ័យ។ គាត់ស្នើសុំអាហារូបករណ៍សិក្សាថ្នាក់អនុបណ្ឌិតជំនាញរដ្ឋបាលសាធារណៈ ដើម្បីចូលរួមចំណែកពង្រឹងគុណភាពរដ្ឋបាលក្នុងវិស័យវប្បធម៌តាមរយៈការជម្រុញដល់វិស័យជំនាញដែលចំណុះអោយមន្ទីរវប្បធម៌ អោយមានសកម្មភាពកាន់តែសកម្មថែមទៀតទាក់ទងនឹងការថែទាំនិងស្តារឡើងវិញនូវសិល្បៈបុរាណផ្សេងៗដែលរងការគំរាមកំហែងរៀបនឹងបាត់បង់ ហើយស្វែងរកធនធានមនុស្សរស់ដែលចេះឧបករណ៍ប្រពៃណីបុរាណកម្រយកមកអភិរក្សនិងផ្ទេរទៅអោយអ្នកជំនាន់ក្រោយអោយបានកាន់តែទូលំទូលាយថែមទៀត។ ជាពិសេសជំនាញនេះនឹងជួយពង្រីកចំណេះដឹងគាត់ទាក់ទងនឹងការគ្រប់គ្រងធនធានមនុស្សក្នុងមន្ទីរវប្បធម៌ និងចេះចាត់ចែងការងាររបស់មន្ត្រីនៅតាមការិយាល័យនីមួយៗអោយបានចំគោលដៅនិងប្រកបដោយប្រសិទ្ធភាពខ្ពស់។

9.9—chan-sovandy–

ចន សុវណ្ណឌី


ចន សុវណ្ណឌី ជានិស្សិតបរិញ្ញាបត្រកំពុងសិក្សាជំនាញគំនូរវិចិត្រកម្មនៅសាកលវិទ្យាល័យភូមិន្ទវិចិត្រសិល្បៈ។ គាត់ស្នើសុំអាហារូបករណ៍ដើម្បីគាំទ្រដល់ការសិក្សាជំនាញគំនូរវិចិត្រកម្មរបស់គាត់នៅសាកលវិទ្យាល័យដោយសារតែថវិកាក្នុងការបង់ថ្លៃសិក្សាជាបញ្ហាមួយធំសម្រាប់គាត់។ គោលដៅរបស់គាត់គឺត្រូវបញ្ចប់ថ្នាក់បរិញ្ញាបត្រនាពេលខាងមុខ។ រួចគាត់នឹងប្រើចំណេះដឹងជំនាញដែលគាត់មាន ពង្រឹងខ្លួនបន្ថែមដើម្បីក្លាយទៅជាសិល្បករមួយរូបរបស់កម្ពុជា ដើម្បីមានឱកាសក្នុងការបង្ហាញទេពកោសល្យរបស់ខ្លួន មិនត្រឹមតែក្នុងស្រុក តែទៅកាន់អន្តរជាតិ។ ក្នុងពេលជានិស្សិតនេះ គាត់មានឱកាសបានចូលបម្រើការក្នុងការជួសជុលគំនូរនៅក្នុងប្រាសាទចន្ទឆាយានៃព្រះបរមរាជវាំង តួនាទីជានិស្សិតហាត់ការ ដែលមានតម្លៃមួយដ៏ធំធេងសម្រាប់គាត់នៅក្នុងវិស័យសិល្បៈវប្បធម៌ ហើយក៏ជាស្ពានដើម្បីចម្លងគាត់អោយកានតែមានភាពរឹងមាំមានមូលដ្ឋានគ្រប់គ្រាន់ក្នុងការធ្វើជាអ្នកបន្តវេនផ្នែកសិល្បៈមួយនេះ។

10.1—morn-mean—

ម៉ន មាន


ម៉ន មាន ជាជនជាតិដើមកួយនៅខេត្តកំពង់ធំ និងជាគ្រូបង្រៀននៅអនុវិទ្យាល័យ។ គាត់ស្នើសុំអាហារូបករណ៍ដើម្បីសិក្សាស្រាវជ្រាវបង្កើតរបាំជនជាតិដើមកួយ ព្រោះជំនឿ ទំនៀមទម្លាប់ និងប្រពៃណីមួយចំនួន កំពុងតែប្រឈមនឹងការបាត់បង់នាពេលអនាគត។ អាហារូបករណ៍នេះនឹងអាចជួយគាត់ក្នុងការកសាងសមត្ថភាព ទទួលបានចំណេះដឹង បទពិសោធន៍ល្អៗ និងការប្រឹក្សាយោបល់ផ្សេងៗពីអ្នកជំនាញផ្នែកសិល្បៈវប្បធម៌ ពិសេសមានឱកាសទទួលបានថវិកាក្នុងដំណើរការគម្រោងដើម្បីអោយគាត់សម្រេចគោលដៅនេះ។ គាត់នឹងបន្តពង្រឹងនិងពង្រីកក្រុមសិល្បៈយុវជនជនជាតិដើមកួយ ដោយគៀងគរកុមារនិងយុវជនអោយចូលរួមយ៉ាងសកម្មក្នុងសកម្មភាពនេះ ដោយសហការជាមួយចាស់ទុំក្នុងសហគមន៍ មន្ទីរវប្បធម៌និងវិចិត្រសិល្បៈខេត្តកំពង់ធំ រួមទាំងអ្នកពាក់ព័ន្ធផ្សេងទៀត ដើម្បីសិក្សាស្រាវជ្រាវចងក្រងបង្កើតនូវរបាំជនជាតិដើមកួយថ្មីៗទៀត។


ជួបជាមួយសិស្សអាហារូបករណ៍សិល្បៈអមតៈអានចន-ផន ឆ្នាំ២០២២

2022-scholar.-student5

ចាន់ សាវតី


សាវតី មានស្រុកកំណើតនៅខេត្តបាត់ដំបង ហើយសព្វថ្ងៃគាត់ធ្វើការជាមន្រ្តីផ្នែកទំនាក់ទំនងនៅរាជធានីភ្នំពេញ។ គាត់ធ្លាប់បំរើការនៅស្ថាប័នសិល្បៈជាច្រើន ហើយគាត់មើលឃើញថាសិល្បករមានទេពកោសល្យនិងសមត្ថភាពខ្ពស់ តែពុំទាន់មានជំនាញផ្សព្វផ្សាយស្នាដៃសិល្បៈរបស់ខ្លួនបានទូលំទូលាយ វតីចង់ចូលរួមចំណែកជាអ្នកជួយផ្សព្វផ្សាយស្នាដៃសិល្បៈពួកគេ និងទាក់ទងជាមួយវិចិត្រសាលទាំងក្នុងនិងក្រៅស្រុក។ ដូច្នេះ ហើយទើបគាត់ស្នើសុំអាហារូបករណ៍រៀនភាសាបារាំង ហើយគាត់នឹងបន្តការសិក្សានៅប្រទេសបារាំងផ្នែកទំនាក់ទំនងនិងប្រព័ន្ធផ្សព្វផ្សាយសិល្បៈ។

2022-scholar.-student8

កែវ គា


កែវ គា ជាសិល្បករ និងជាអ្នកឆ្លាក់ល្ខោនស្រមោលស្បែកធំ ល្ខោនស្រមោលស្បែកតូច គាត់ក៏ជាប្រធានសិល្បករនៅ Bambu Stage ក្នុងខេត្តសៀមរាបផងដែរ។ គាត់និងក្រុមបានដំឡើងល្ខោនអប់រំជាច្រើនដែលបង្កប់នូវអត្ថន័យពីជីវភាពប្រជាជន បញ្ហាក្នុងសង្គម និងប្រវត្តិសាស្រ្តជាដើម។ គាត់ក៏ធ្លាប់បង្ហាត់បង្រៀនឆ្លាក់ស្បែកដល់ក្មេងៗនៅតាមសាលារៀន និងសាធារណជនផងដែរ។ គាត់ស្នើសុំអាហារូបករណ៍រៀនជំនាញសម្តែងសិល្បៈបន្ថែមដើម្បីសិក្សាឲ្យកាន់តែស៊ីជម្រៅលើទម្រង់សិល្បៈខាងលើ ជាពិសេសលើមូលដ្ឋានគ្រឹះ។

2022-scholar.-student

ប៉េង ចាន់ទ្រា


ចាន់ទ្រា ជាសិស្សទើបបញ្ចប់ថ្នាក់វិទ្យាល័យនៅខេត្តកំពង់ធំ។ គាត់ជាអ្នកសម្របសម្រួល និងដឹកនាំក្នុងក្រុមសិល្បៈ រួមមានផ្នែកទំនាក់ទំនងនិងផ្នែកហិរញ្ញវត្ថុ ដើម្បីផ្សព្វផ្សាយដល់មនុស្សវ័យក្មេងនៅក្នុងសហគមន៍ និងសាលារៀន។ គាត់ស្នើសុំអាហារូបករណ៍រៀនភាសាអង់គ្លេសទូទៅ ដើម្បីបង្កើនចំណេះដឹងភាសាអង់គ្លេសសម្រាប់ការទំនាក់ទំនង ជាពិសេសជាមួយបរទេស ទាំងផ្សព្វផ្សាយសិល្បៈវប្បធម៌។

2022-scholar.-student7

ផ្លាន សុខជា


សុខជា មានស្រុកកំណើតនៅខេត្តរតនគិរី ហើយសព្វថ្ងៃជានិស្សិតស្ថាបត្យកម្មនៅសាកលវិទ្យាល័យន័រតុន។ គាត់ស្នើសុំអាហារូបករណ៍ដើម្បីទ្រទ្រង់ការសិក្សាជំនាញស្ថាបត្យកម្មរបស់គាត់នៅសាកលវិទ្យាល័យ។ អាហារូបករណ៍នេះនឹងជាចំណែកធំមួយ ជំរុញការសិក្សារបស់គាត់ឲ្យចប់ចុងចប់ដើម ជួយឲ្យគាត់ក្លាយជាស្ថាបត្យករមួយរូបដែលលើកតម្កើងសិល្បៈវប្បធម៌ខ្មែរ និងជាពិសេសសិល្បៈជនជាតិដើមភាគតិច និងជាគំរូមួយសម្រាប់យុវជននៅក្នុងសហគមន៍គាត់ផងដែរ។

2022-scholar.-student9

ស៊ា សុភារុន


សុភារុន បានបញ្ចប់ការសិក្សាជំនាញបុរាណវិទ្យាពីសាកលវិទ្យាល័យភូមិន្ទវិចិត្រសិល្បៈ។ សព្វថ្ងៃ គាត់ជាបុគ្គលិកបច្ចេកទេសនៅអាជ្ញាធរជាតិអប្សរា ការងារគាត់ទាក់ទងនឹងការថែរក្សា អភិរក្ស ស្រាវជ្រាវ និងចងក្រងនូវសម្បត្តិបេតិកភណ្ឌ។ គាត់ស្នើសុំអាហារូបករណ៍រៀនភាសាអង់គ្លេសទូទៅ ដោយសារវាចាំបាច់សម្រាប់ការទំនាក់ទំនង។ ម៉្យាងវិញទៀត វិស័យបុរាណវិទ្យា មានការសិក្សាចងក្រងជាភាសាអង់គ្លេស។ គាត់នឹងត្រូវធ្វើការបកប្រែឯកសារទាំងនោះដើម្បីផ្សព្វផ្សាយនិងចែករំលែកដល់យុវជនជំនាន់ក្រោយ។ គាត់ក៏មានគោលបំណងបន្តការសិក្សានៅបរទេស។ អាហារូបករណ៍នេះនឹងជួយឲ្យគាត់ក្លាយទៅជាអ្នកបន្តវេន និងជាអ្នកដឹកនាំនាពេលអនាគតដែលពោរពេញដោយសមត្ថភាព ទាំងផ្នែកជំនាញនិងផ្នែកភាសា។

2022-scholar.-student3

សូរ ចាន់នូ


ចាន់នូ ជាគ្រូបង្រៀនសិល្បៈរបាំបុរាណ និងរបាំប្រពៃណី នៅសាលាបឋមសិក្សាមួយក្នុងខេត្តសៀមរាប។ គាត់ស្នើសុំអាហារូបករណ៍រៀនបរិញ្ញាបត្រផ្នែកគ្រប់គ្រង ដើម្បីយល់ដឹងពីការគ្រប់គ្រង និងការដឹកនាំសិល្បករ។ អាហារូបករណ៍នេះក៏នឹងជួយពង្រីកចំណេះដឹងគាត់បន្ថែមទាំងការអភិវឌ្ឍខ្លួន និងភាពជាអ្នកដឹកនាំ និងក្លាយជាការញ៉ាំងចិត្តដល់ក្មេងក្នុងសហគមន៍គាត់ផងដែរ​។

2022-scholar.-student6

សរ សុផៃ


សរ សុផៃ បានបញ្ចប់ការសិក្សាបរិញ្ញបត្រជំនាញបុរាណវិទ្យាពីសាកលវិទ្យាល័យភូមិន្ទវិចិត្រសិល្បៈ ហើយសព្វថ្ងៃកំពុងបម្រើការងារជាមន្រ្តីរាជការនៅមន្ទីរវប្បធម៌ និងវិចិត្រសិល្បៈខេត្តព្រៃវែង។ គាត់ស្នើសុំអាហារូបករណ៍រៀនអនុបណ្ឌិតជំនាញបុរាណវិទ្យានៅរាជបណ្ឌិត្យសភាកម្ពុជា ដើម្បីសិក្សាបន្តនិងចេះវិភាគកាន់តែស៊ីជម្រៅ ដោយសារគាត់មានគោលបំណង សិក្សាចងក្រងស្ថាននាមស្រុកនៅក្នុងខេត្តព្រៃវែង និងរៀបចំចុះបញ្ជីវត្ថុសិល្បៈធ្វើជាសៀវភៅសមុច្ច័យសារមន្ទីរខេត្តព្រៃវែង។

2022-scholar.-student2

ត្រើយ យ៉ាម


យ៉ាម ជាសិស្សនៅវិទ្យាល័យជ្រោះប៊ូស្រា ខេត្តមណ្ឌលគិរី និងជាអ្នករាំរបាំក្នុងក្រុមសិល្បៈវប្បធម៌ពូនងប៊ូស្រា។ គាត់ស្នើសុំអាហារូបករណ៍រៀនភាសាអង់គ្លេសទូទៅ ដើម្បីងាយស្រួលក្នុងការបង្ហាញពីសិល្បៈវប្បធម៌របស់គាត់ទៅកាន់ពិភពលោក។ គាត់មានក្តីស្រមៃ ចង់ឲ្យសិល្បៈសហគមន៍គាត់មានភាពរីកចម្រើន និងមានភាពល្បីល្បាញ។ ដូច្នេះអាហារូបករណ៍នេះនឹងអាចជួយគាត់មានចំណេះដឹងបន្ថែមផ្នែកភាសាអង់គ្លេស មានភាពជាអ្នកដឹកនាំ បណ្តុះគំនិតថ្មីៗ និងមានភាពក្លាហានជាងមុន ដើម្បីជាគំរូដល់សហគមន៍គាត់។

2022-scholar.-student4

ទ្រី សុខារស្មី


សុខារស្មី បច្ចុប្បន្នជានិស្សិតជំនាញស្ថាបត្យកម្មនៅសាកលវិទ្យាល័យភូមិន្ទវិចិត្រសិល្បៈ។ គាត់ស្នើសុំអាហារូបករណ៍រៀនភាសាអង់គ្លេសទូទៅ ព្រោះវាជាទុនសម្រាប់ការសិក្សាស្រាវជ្រាវពីផ្នែកស្ថាបត្យកម្មបន្ថែមឲ្យកាន់តែច្បាស់ ដើម្បីក្លាយខ្លួនជាបុគ្គលមានសមត្ថភាព ហើយគាត់ក៏មានបំណងក្លាយជាគ្រូបង្រៀនជំនាញនេះនាពេលអនាគតផងដែរ។ បន្ថែមពីនេះទៀត អាហារូបករណ៍នេះនឹងជួយឲ្យគាត់កាន់តែស្គាល់ខ្លួនឯងច្បាស់។

2022-scholar.-student10

យាន ឆេងហាក់


ឆេងហាក់ កំពុងសិក្សាជំនាញសិល្បៈនាដសាស្រ្តឆ្នាំទី១នៅសាកលវិទ្យាល័យភូមិន្ទវិចិត្រសិល្បៈ។ មុនពេលបន្តការសិក្សានៅសាកលវិទ្យាល័យ គាត់បានចូលរួមសកម្មភាពផ្សព្វផ្សាយសិល្បៈផ្នែករបាំទៅសហគមន៍ក្នុងខេត្តកំពង់ធំ ជាប្រធានដឹកនាំក្រុមនិងជាអ្នករបាំផងដែរ។ គាត់ស្នើសុំអាហារូបករណ៍រៀនភាសាអង់គ្លេសទូទៅ វាអាចជួយឲ្យគាត់អាចបញ្ចប់ការសិក្សាមុខជំនាញសិល្បៈបានដោយរលូន និងយកចំណេះដឹងដែលមានទៅផ្សព្វផ្សាយ ព្រមទាំងបណ្តុះបណ្តាលឧត្តមគតិស្នេហាវិស័យសិល្បៈដល់ក្មេងជំនាន់ក្រោយ ជាពិសេសលើកតម្កើងនិងបង្កើតមុខរបរដើម្បីផ្គត់ផ្គង់ជីវភាពសិល្បករឲ្យមានជីវភាពល្អប្រសើរ។

មតិរបស់សិស្ស៖

“ខ្ញុំរីករាយចូលរួមប្រជុំអាហារូបករណ៍ជានិច្ច ព្រោះខ្ញុំអាចរៀនសូត្រចំណេះដឹងថ្មីៗ កសាង​ទំនុកចិត្តលើខ្លួនឯង និងពង្រឹងទំនាក់ទំនងជាមួយមិត្តរបស់ខ្ញុំ។”

ខឹម សុខស្រីមាន –​ និស្សិតគំនូរ

“ការនិយាយ និងការជឿជាក់លើខ្លួនឯងរបស់ខ្ញុំឥឡូវកាន់តែប្រសើរឡើង ក្រោយពីនាងខ្ញុំ​បាន​ចូលរួមសិក្ខាសាលា និងវគ្គបណ្តុះបណ្តាលដែលរៀបចំដោយសិល្បៈខ្មែរអមតៈ។”

ស្ងួន កវីសិរិរ័ត្ន – និស្សិតពិណ

“ខ្ញុំមានទំនុកចិត្តលើខ្លួនឯងជាងមុនក្នុងការចែករំលែកគំនិតរបស់ខ្ញុំ ហើយខ្ញុំមានបំណង​ចូលរួម​ក្នុងកម្មវិធីអប់រំ ផ្សេងៗទៀត ដើម្បីបង្កើនចំណេះដឹង និងជំនាញសិល្បៈ និងចំណេះដឹងទូទៅ​របស់ខ្ញុំកាន់តែប្រសើរឡើង។”

អែល ហ៊ុយណូ – និស្សិតគំនូរ

Support us

follow us

Start typing and press Enter to search