ចំណាប់អារម្មណ៍នាយិកាកម្មវិធី

យ៉ុន សុខខន នាយិកាកម្មវិធី

ពេលខ្ញុំចាប់ផ្តើមការងារជាមួយអង្គការសិល្បៈខ្មែរអមតៈក្នុងឆ្នាំ ២០១២ ខ្ញុំពិតជាមានមោទនភាពដែលបានធ្វើការងារសម្របសម្រួលជាមួយព្រឹទ្ធាចារ្យសិល្បៈដើម្បីចែករំលែកចំណេះដឹងរបស់ពួកគាត់ដល់សិល្បករជំនាន់ក្រោយ ហើយនេះគឺជាការងារស្នូលរបស់យើងរយៈពេលជិតមួយទសវត្សរ៍ដំបូង។ ក្រោយមក ខ្ញុំពិតជារីករាយនឹងការងារនៅអង្គការសិល្បៈខ្មែរអមតៈពេលដែលយើងបានចាប់ផ្តើមរៀបចំកម្មវិធីអភិវឌ្ឍអាជីព ដើម្បីគាំទ្រដល់សិល្បករ និងអ្នកធ្វើការក្នុងវិស័យសិល្បៈវប្បធម៌ ក្នុងគោលដៅដើម្បីបន្តនិរន្តរភាពការងាររបស់ពួកគេ និងផ្តល់ឱកាសឱ្យពួកគេអាចប្រាប់ពីរឿងរ៉ាវក្នុងសង្គមកម្ពុជាបច្ចុប្បន្នតាម រយៈភាពច្នៃប្រតិដ្ឋ និងការបញ្ចេញមតិរបស់ពួកគេ។

«ធ្វើការជាមួយសិល្បករ គឺជាអភ័យឯកសិទ្ធិ ហើយខ្ញុំពិតជាមានមោទនភាពតាមរយៈការងាររបស់អង្គការសិល្បៈខ្មែរអមតៈ និងបេសកកម្មផ្ទាល់ខ្លួនរបស់ខ្ញុំ។»

បច្ចុប្បន្ននេះ យើងបានផ្តល់មូលនិធិកាន់តែច្រើនឡើងជាងពេលមុនដែលឆ្លុះបញ្ចាំងពីតួនាទី និងការងារដែលកំពុងរីកចម្រើនរបស់យើងក្នុងនាមជាអ្នកផ្តល់មូលនិធិ។ វាពិតជាមានការលំបាកក្នុងការផ្តល់មូល និធិកាន់តែច្រើនឡើងៗ ពីព្រោះយើងត្រូវមានទំនួលខុសត្រូវជាមួយនឹងតម្រូវការចំបាច់ និងធានាឲ្យមាននូវតម្លាភាព ខណៈពេលដែលធ្វើការជាមួយសិល្បករពាក់ព័ន្ធនឹងការងាររដ្ឋបាលជាច្រើន។ នេះមិនមែនជារឿងធម្មតាទេនៅក្នុងប្រទេសកម្ពុជាដែលមានមូលនិធិក្នុងស្រុកសម្រាប់សិល្បៈ និងវប្បធម៌។ និយាយឱ្យសាមញ្ញទៅ នេះមិនត្រឹមតែថ្មីសម្រាប់សិល្បករប៉ុណ្ណោះទេ ថែមទាំងថ្មីសម្រាប់អង្គការសិល្បៈខ្មែរអមតៈ ខខណៈដែលយើងត្រូវរៀនសូត្រកំឡុងពេលប្រតិបត្តិ និងបន្តកែលម្អជាបន្តបន្ទាប់។

ជាការឆ្លុះបញ្ចាំងផ្ទាល់ខ្លួនរបស់ខ្ញុំក្នុងរយៈពេល ១០ ឆ្នាំក្នុងវិស័យនេះ ហើយទោះបីជាមានការរាតត្បាតនៃជំងឺកូវិដក៏ដោយ ខ្ញុំនៅតែបន្តឃើញអ្នកដែលមានទេពកោសល្យ ថាមពល ភាពជាអ្នកដឹកនាំ គំនិតផ្តួចផ្តើមថ្មីៗ ត្រូវការការវិនិយោគនេះ ហើយនេះជាការងារសំខាន់ដើម្បីទ្រទ្រង់ប្រព័ន្ធអេកូសិល្បៈក្នុងរយៈពេលយូរ។ ខ្ញុំពិតជាមានសុទិដ្ឋិនិយមយ៉ាងខ្លាំងជាមួយនឹងអ្វីដែលអង្គការសិល្បៈខ្មែរអមតៈកំពុងធ្វើនៅពេលនេះ ពីព្រោះយើងអាចរៀបចំផែនការជាមុន និងដើរតួនាទីយ៉ាងសំខាន់ក្នុងការបំពេញចន្លោះខ្វះខាត់ក្នុងវិស័យនេះ។