(បិទទួលពាក្យ) សេចក្តីប្រកាសអាហារូបករណ៍សិល្បៈអមតៈ អាន ចន ផន

សឿត សុវណ្ណនី

សឿត សុវណ្ណនី មានទីកន្លែងកំណើតនៅខេត្តបន្ទាយមានជ័យហើយសព្វថ្ងៃរស់នៅរាជធានីភ្នំពេញ។ សុវណ្ណនី ជាអតីតនិស្សិត នៅសាកលវិទ្យាល័យភូមិន្ទវិចិត្រសិល្បៈ ជំនាញគំនូរសារគមនាគមន៍។ សព្វថ្ងៃ សុវណ្ណនី ប្រកបការងារឯករាជ្យជាអ្នករៀបចំកម្មវិធីគ្រប់ប្រភេទ, អ្នកសម្របសម្រួល គ្រប់គ្រងសិល្បៈសម្តែង តន្រ្តី និងទស្សនីយភាព, អ្នកសម្របសម្រួលសិល្បករ និងជាពិធីការនី។ សុវណ្ណនី ស្នើសុំអាហារូបករណ៍សិក្សាភាសាអង់គ្លេសទូទៅ ដើម្បីបំពេញភាពខ្វះខាតរបស់ខ្លួនក្នុងការប្រើប្រាស់ភាសាអង់គ្លេសលើអាជីពការងារ និងការប្រាស្រ័យទាក់ទងគ្នា ដែលអាចទទួលបានឱកាសបន្ថែមដើម្បីរីកចម្រើនបន្តលើជំនាញក្នុងវិស័យសិល្បៈ។

ជា គឹមជិន

មានទីកន្លែងកំណើតនៅខេត្តកោះកុងហើយសព្វថ្ងៃរស់នៅខេត្តព្រះសីហនុ។ គឹមជិន ជាអតីតនិស្សិត នៅសាកលវិទ្យាល័យភូមិន្ទវិចិត្រសិល្បៈ ជំនាញបុរាណវិទ្យា ហើយបច្ចុប្បន្នជាមន្រ្តីក្នុងការិយាល័យបេតិកភ័ណ្ឌនៃមន្ទីរវប្បធម៌និងវិចិត្រសិល្បៈខេត្តព្រះសីហនុ។ គឹមជិន ស្នើសុំអាហារូបករណ៍សិក្សាភាសាអង់គ្លេសទូទៅដើម្បីអាចស្វែងយល់ឯកសារពាក់ព័ន្ធនឹងវប្បធម៌ដែលសរសេរជាភាសាអង់គ្លេស និងដើម្បីមានឱកាសបន្តការសិក្សានៅបរទេសក្នុងវិស័យវប្បធម៌ ទទួលបានចំណេះដឹងនិងបច្ចេកទេសថ្មីៗបន្ថែមក្នុងការស្រាវជ្រាវ ជាពិសេសទាក់ទងនឹងវត្ថុសិល្បៈ។

គូ សម្ផស្ស

ជាជនជាតិដើមកួយ មានទីកន្លែងកំណើតនិងសព្វថ្ងៃរស់នៅខេត្តកំពង់ធំ។ សម្ផស្ស ជាគ្រូបង្រៀនម្នាក់ដែលបានបង្រៀននៅតំបន់សហគមន៍ជនជាតិដើមកួយអស់រយៈពេល ៤ឆ្នាំមកហើយ។ សម្ផស្ស ក៏ជាយុវជនស្ម័គ្រចិត្តសម្របសម្រួលក្រុមសិល្បៈក្នុងសហគមន៍ផងដែរ។ សម្ផស្ស ស្នើសុំអាហារូបករណ៍សិក្សាភាសាអង់គ្លេស ដោយសារសហគមន៍របស់គាត់ត្រូវការធនធានមនុស្សបន្ថែមដែលអាចចេះប្រើភាសាអង់គ្លេស ដើម្បីចែករំលែកសិល្បៈវប្បធម៌របស់ជនជាតិដើមភាគតិចកួយឱ្យបានកាន់តែទូលំទូលាយទាំងក្នុងនិងក្រៅប្រទេស។

ផាន កុថាណុ

មានទីកន្លែងកំណើតនិងសព្វថ្ងៃរស់នៅខេត្តសៀមរាប។ ថាណុ ជាអតីតនិស្សិត នៃសាកលវិទ្យាល័យភូមិន្ទវិចិត្រសិល្បៈ ជំនាញបុរាណវិទ្យា ហើយសព្វថ្ងៃជាបុគ្គលិកកិច្ចសន្យានៅបណ្ណាល័យនៃសាកលវិទ្យាល័យភូមិន្ទវិចិត្រសិល្បៈ ដែលមានតួនាទីចុះបញ្ជីសៀវភៅនានាក្នុងបណ្ណាល័យ និងជាអ្នកស្រាវជ្រាវឯកសារខ្លីៗអំពីវប្បធម៌ខ្មែរផង។ ថាណុ ស្នើសុំអាហារូបករណ៍សិក្សាថ្នាក់អនុបណ្ឌិតបុរាណវិទ្យា ដើម្បីពង្រឹងលើចំណេះជំនាញនិងអភិវឌ្ឍខ្លួនក្នុងការសិក្សាស្រាវជ្រាវក្នុងវិស័យសិល្បៈវប្បធម៌ឱ្យកាន់តែប្រសើរ ឈានចូលក្នុងវិស័យអប់រំនិងចែករំលែក និងសម្រេចបំណងក្លាយជាមន្រ្តីរាជការនៃក្រសួងវប្បធម៌និងវិចិត្រសិល្បៈ។

ដន សុភាង

មានទីកន្លែងកំណើតនៅខេត្តកំពង់ចាមហើយសព្វថ្ងៃរស់នៅរាជធានីភ្នំពេញ។ សុភាង ជាអតីតនិស្សិតនៃសាកលវិទ្យាល័យភូមិន្ទភ្នំពេញ ជំនាញសង្គមកិច្ចវិទ្យា។ សព្វថ្ងៃ សុភាងកំពុងហាត់រៀននិពន្ធបទភ្លេងដោយខ្លួនឯង ដោយការរកឃើញខ្លួនឯង ចង់ដើរតាមក្តីស្រមៃ ស្រឡាញ់សិល្បៈតន្រ្តីតាំងពីតូច។ សុភាង ស្នើសុំអាហារូបករណ៍សិក្សាជំនាញកុំព្យូទ័រ (Studio) ដើម្បីអាចបង្កើតស្នាដៃសិល្បៈ ដូចជាធ្វើភ្លេង ថតសំឡេង កែសំឡេង និងផលិតជាចម្រៀងទាំងមូល។

ច្រឹក សេ

ច្រឹក សេ (ហៅ ចៅ ភេត្រា) មានទីកន្លែងកំណើតនិងសព្វថ្ងៃរស់នៅខេត្តសៀមរាប។ ចៅ ភេត្រា ជាអ្នកច្រៀងចាប៉ីដងវែង និងជាប្រធានរោងជាងចាប៉ីដងវែងមួយកន្លែងនៅខេត្តសៀមរាប។ ចៅ ភេត្រា ស្នើសុំអាហារូបករណ៍សិក្សាជំនាញផលិតឧបករណ៍ភ្លេងបុរាណ ដោយសារមានចិត្តស្រឡាញ់ចង់អភិរក្ស ផ្សព្វផ្សាយ បន្តវេន និងមានគោលដៅចង់បណ្តុះបណ្តាលក្មេងជំនាន់ក្រោយនិងផ្សព្វផ្សាយទៅកាន់ពិភពលោកឱ្យបានស្គាល់។

រិន ពេជ្ជរដ្ឋ

មានទីកន្លែងកំណើតនៅខេត្តតាកែវហើយសព្វថ្ងៃរស់នៅខេត្តកណ្តាល។ ពេជ្ជរដ្ឋ ជាអតីតនិស្សិត នៃសាកលវិទ្យាល័យភូមិន្ទភ្នំពេញ ជំនាញប្រវត្តិវិទ្យា និងសព្វថ្ងៃជាមន្រ្តីការិយាល័យសារមន្ទីរនៃមន្ទីរវប្បធម៌និងវិចិត្រសិល្បៈខេត្តកណ្តាល។ ពេជ្ជរដ្ឋ ស្នើសុំអាហារូបករណ៍សិក្សាអនុបណ្ឌិតជំនាញបុរាណវិទ្យាដើម្បីពង្រឹងចំណេះដឹង ចំណេះធ្វើ សមត្ថភាពពេញលេញ សម្រាប់ការចូលរួមអភិរក្ស ចងក្រង ផ្សព្វផ្សាយដល់សាធារណជនទូទៅ នៃតម្លៃអត្តសញ្ញាណស្ថាបត្យកម្មខ្មែរតាមវត្តអារាម រួមមាន ព្រះវិហារ សាលាឆាន់ កុដិ និងចេតិយជាដើម។

ប៊ុត សុនា

ប៊ុត សុនា មានទីកន្លែងកំណើតនៅខេត្តព្រៃវែងហើយសព្វថ្ងៃរស់នៅរាជធានីភ្នំពេញ។ សុនា ជាអតីតនិស្សិត នៅសាកលវិទ្យាល័យភូមិន្ទវិចិត្រសិល្បៈ ជំនាញបុរាណវិទ្យា។ ក្នុងឆ្នាំ២០២១ សុនា បានចូលបម្រើការជាមន្រ្តីជាប់កិច្ចសន្យា នៅក្រសួងវប្បធម៌ និងវិចិត្រសិល្បៈ។ ការធ្វើការនៅក្រសួងវប្បធម៌ និងវិចិត្រសិល្បៈ សុនា បានបទពិសោធន៍ជាច្រើនក្នុងវិស័យសិល្បៈវប្បធម៌ ដូចជា ការងាររដ្ឋបាល សម្របសម្រួលកម្មវិធីសិល្បៈនានា សម្របសម្រួលការងារជាមួយសិប្បកម្មក្នុងអង្គការ សហគមន៍ សមាគម ស្ថាប័នក្រៅរដ្ឋាភិបាល, ការងារប្រមូលទិន្នន័យមត៌កអរូបីទូទាំងប្រទេស និងរៀបចំសិក្ខាសាលាផ្សេងៗ។ សុនា ស្នើសុំអាហារូបករណ៍សិក្សាភាសាអង់គ្លេសទូទៅ ដើម្បីសម្រួលក្នុងការស្រាវជ្រាវឯកសារផ្សេងៗដែលទាក់ទងនឹងការងារនិងវិស័យបុរាណវិទ្យា (ផ្នែកសិល្បៈខ្មែរ) និងចងក្រងទុកជាឯកសារ ដែលសុនាកំពុងធ្វើការជាអ្នកសម្របសម្រួលក្នុងវិស័យនេះស្រាប់។

សៀន សុខនី

សៀន សុខនី ជាជនជាតិព័រ មានទីកន្លែងកំណើតនៅខេត្តពោធិ៍សាត់ហើយសព្វថ្ងៃរស់នៅរាជធានីភ្នំពេញ។ សុខនី បច្ចុប្បន្នធ្វើការងារស្ម័គ្រចិត្តបង្កើតក្រុមសិល្បៈចម្រៀង រលកសំឡេងជនជាតិដើម ក្នុងគោលបំណងផ្សព្វផ្សាយវប្បធម៌ប្រពៃណី ជាពិសេស ភាសា របៀបរបបរស់នៅរបស់ជនជាតិដើមភាគតិចនៅកម្ពុជា។ សុខនី ស្នើសុំអាហារូបករណ៍សិក្សាភាសាអង់គ្លេសទូទៅដើម្បីពង្រឹងចំណេះដឹងភាសាបរទេស បង្កើនឱកាសស្វែងរកប្រភពជំនួយជួយអភិវឌ្ឍក្រុម បង្កើតមូលនិធិជួយការអប់រំរបស់កុមារនិងយុវជនជនជាតិដើមភាគតិចនៅកម្ពុជា អាចផ្សព្វផ្សាយវប្បធម៌និងបញ្ហានានារបស់ក្រុមនិងសហគមន៍ដល់អ្នកខាងក្រៅនិងពិភពលោកបានយល់ដឹង។

មាស សារឹម

មាស សារឹម មានទីកន្លែងកំណើតនៅខេត្តស្វាយរៀងហើយសព្វថ្ងៃរស់នៅខេត្តពោធិ៍សាត់។ សារឹម ជាអតីតនិស្សិតបុរាណវិទ្យានៃសាកលវិទ្យាល័យភូមិន្ទវិចិត្រសិល្បៈ និងកំពុងបម្រើការនៅមន្ទីរវប្បធម៌ និងវិចិត្រសិល្បៈខេត្តពោធិ៍សាត់ ជាអនុប្រធានការិយាល័យសារមន្ទីរ ទទួលបន្ទុករៀបចំចុះបញ្ជីវត្ថុបុរាណចូលក្នុងប្រព័ន្ធ Database និងដាក់តាំងបង្ហាញវត្ថុបុរាណនៅសារមន្ទីរ។ សារឹម ស្នើសុំអាហារូបករណ៍សិក្សាភាសាបារាំងទូទៅ ដើម្បីពង្រឹងចំណេះដឹងផ្នែកភាសានេះ ងាយស្រួលក្នុងការអភិរក្ស ស្រាវជ្រាវ ចងក្រងឯកសារការងារ និងអាចទាក់ទងជាមួយបរទេសដែលចង់ស្វែងយល់ពីវប្បធម៌ និងសិល្បៈជាតិផងដែរ។

ប៉ោ ចិន្តា

ប៉ោ ចិន្តា មានទីកន្លែងកំណើតនៅខេត្តកំពង់ធំហើយសព្វថ្ងៃរស់នៅរាជធានីភ្នំពេញ។ ចិន្តា ជានិស្សិតតែងនិពន្ធទូទៅនៅមហាវិទ្យាល័យសិល្បៈនាដសាស្រ្ត នៃសាកលវិទ្យាល័យភូមិន្ទវិចិត្រសិល្បៈ។ ចិន្តា ស្នើសុំអាហារូបករណ៍គាំទ្រលើការសិក្សាជំនាញនៅសាកលវិទ្យាល័យ ដើម្បីឈានទៅសម្រេចគោលដៅក្នុងវិស័យសិល្បៈវប្បធម៌របស់ខ្លួន រួមមាន ការបង្កើតសមាគមសិល្បៈនៅឯស្រុកកំណើតនាខេត្តកំពង់ធំដើម្បីជួយឱ្យក្មេងៗទទួលបានការយល់ដឹងពីសិល្បៈវប្បធម៌កាន់តែច្បាស់ ព្រមទាំងចេះស្រឡាញ់ ការពារ និងផ្សព្វផ្សាយ និងចូលរួមចំណែកផលិតខ្សែភាពយន្ត និងសៀវភៅ ដែលមានគុណភាពខ្ពស់នៅក្នុងស្រុក ព្រមទាំងអាចប្រកួតប្រជែងជាមួយទីផ្សារខាងក្រៅស្រុកបាន។

គឹម នឹង

គឹម នឹង មានទីកន្លែងកំណើតនិងកំពុងរស់នៅខេត្តសៀមរាប។ នឹង ជាអតីតនិស្សិតបុរាណវិទ្យានៃសាកលវិទ្យាល័យភូមិន្ទវិចិត្រសិល្បៈ ហើយសព្វថ្ងៃជាមន្រ្តីជាប់កិច្ចសន្យានៅក្រសួងវប្បធម៌ និងវិចិត្រសិល្បៈ ដែលមានតួនាទីជួយសម្របសម្រួលកិច្ចការផ្សេងៗដែលទាក់ទងនឹងវិស័យសិល្បៈវប្បធម៌។ ថ្មីៗនេះ នឹង កំពុងចូលរួមចំណែកសិក្សាចងក្រងឯកសារទាក់ទងនឹង សិល្បៈ ទំនៀមទម្លាប់ ប្រពៃណី អារ្យធម៌ វប្បធម៌ ជាពិសេសផ្តោតសំខាន់ទៅលើបេតិកភណ្ឌវប្បធម៌អរូបី។ នឹង ស្នើសុំអាហារូបករណ៍សិក្សាភាសាអង់គ្លេសទូទៅដើម្បីពង្រឹងចំណេះដឹងផ្នែកភាសានេះក្នុងការធ្វើការព្រោះឯកសារនិងវីដេអូផ្សេងៗដែលទាក់ទងនឹងសិល្បៈភាគច្រើនសរសេរឬនិយាយជាភាសាអង់គ្លេស ហើយក៏ដើម្បីបង្កភាពងាយស្រួលក្នុងការទាក់ទងការងារជាមួយអង្គការឬស្ថាប័នដៃគូទាំងក្នុងប្រទេសនិងអន្តរជាតិផងដែរ។

ទីវ ស៊ីម

ទីវ ស៊ីម ជាជនជាតិទំពួនកាត់គ្រឹង មានទីកន្លែងកំណើតនិងកំពុងរស់នៅខេត្តរតនគិរី។ ស៊ីម បានបញ្ចប់ការសិក្សាថ្នាក់បរិញ្ញាបត្រនិងអនុបណ្ឌិតជំនាញគ្រប់គ្រង។ ស៊ីម មានបទពិសោធន៍ដឹកនាំក្រុមយុវជនភូមិ សម្របសម្រួលការងារអភិវឌ្ឍន៍ទូទៅនិងការអប់រំសហគមន៍ពីការការពារនិងថែរក្សាវប្បធម៌ជនជាតិដើមភាគតិច ហើយបច្ចុប្បន្នកំពុងគ្រប់គ្រងនិងដឹកនាំក្រុមយុវជនជនជាតិដើមភាគតិចចំនួន២៥នាក់ក្នុងមួយឆ្នាំ។ ស៊ីម ស្នើសុំអាហារូបករណ៍បន្តការសិក្សាថ្នាក់បណ្ឌិតជំនាញគ្រប់គ្រង ដើម្បីពង្រឹងសមត្ថភាព ជំនាញ ឥទ្ធិពល និងចំណេះដឹងផ្នែកយុទ្ធសាស្រ្តក្នុងការគ្រប់គ្រងនិងដឹកនាំ ជាពិសេស កិច្ចការក្នុងសង្គម ការជំរុញកិច្ចការអប់រំសិល្បៈវប្បធម៌ សាមគ្គីភាព វិស័យសេដ្ឋកិច្ច និងយុទ្ធសាស្រ្តក្នុងការអភិវឌ្ឍនិងថែរក្សាមត៌កសម្រាប់មនុស្សជាតិនិងក្មេងជំនាន់ក្រោយដោយមានគុណភាព ប្រសិទ្ធភាព និងនិរន្តរភាព។

ស៊ីន ម៉ៅធាង

ស៊ីន ម៉ៅធាង មានទីកន្លែងកំណើតនៅខេត្តត្បូងឃ្មុំហើយសព្វថ្ងៃរស់នៅរាជធានីភ្នំពេញ។ ម៉ៅធាង កំពុងសិក្សាបរិញ្ញាបត្រជំនាញភាសាវិទ្យា បរិញ្ញាបត្រដឹកនាំរឿងរបាំ និងល្ខោនខោល។ ម៉ៅធាង មានគោលដៅវែងឆ្ងាយក្នុងវិស័យសិល្បៈវប្បធម៌ ក្នុងការរៀបរៀងចងក្រងសៀវភៅសិក្សាគោល ស្រាវជ្រាវអំពីសិល្បៈវប្បធម៌ ជាពិសេសទម្រង់ល្ខោនខោល ឱ្យមានភាពសម្បូរបែបក្នុងការសិក្សារៀនសូត្រ ងាយស្រួលដល់អ្នកជំនាន់ក្រោយ និងដំឡើងស្នាដៃថ្មីក្នុងទម្រង់ល្ខោនខោលនិងសហសម័យ។ ម៉ៅធាង ស្នើសុំអាហារូបករណ៍សិក្សាបរិញ្ញាបត្រដឹកនាំរឿងរបាំ ដើម្បីសម្រេចគោលដៅខាងលើ ក្នុងការពង្រឹងសមត្ថភាព មានវិជ្ជាជីវៈជាអ្នកសិល្បៈអាជីព និងមានពេលវេលាស្រាវជ្រាវលើវិស័យសិល្បៈវប្បធម៌យ៉ាងពិតប្រាកដ។

សៀង បញ្ញា

សៀង បញ្ញា មានទីកន្លែងកំណើតនៅខេត្តកំពង់ស្ពឺហើយសព្វថ្ងៃរស់នៅរាជធានីភ្នំពេញ។ បញ្ញា បានបញ្ឈប់ការសិក្សាជំនាញស្ថាបត្យកម្មដោយសារកង្វះខាតលទ្ធភាព ហើយសព្វថ្ងៃកំពុងសិក្សាជំនាញបុរាណវិទ្យានៅសាកលវិទ្យាល័យភូមិន្ទវិចិត្រសិល្បៈ។ បញ្ញា ស្នើសុំអាហារូបករណ៍សិក្សាភាសាបារាំងទូទៅ ដើម្បីជាជំនួយដល់ការសិក្សាជំនាញបុរាណវិទ្យា ដោយមើលឃើញពីសារៈសំខាន់របស់ភាសានេះក្នុងការសិក្សាជំនាញបុរាណវិទ្យា ហើយក៏ជាមធ្យោបាយដែលនាំឱ្យបញ្ញាអាចសិក្សាកាន់តែទូលំទូលាយដើម្បីអភិវឌ្ឍជំនាញរបស់ខ្លួន និងបម្រើការលើវិស័យនេះក្នុងការថែរក្សាសម្បត្តិបេតិកភណ្ឌជាតិនិងប្រាសាទបុរាណដែលនៅសេសសល់។

ក្រាក់ ទីធ្លា

ក្រាក់ ទីធ្លា ជាជនជាតិពូនង មានទីកន្លែងកំណើតនៅខេត្តមណ្ឌលគិរីហើយសព្វថ្ងៃរស់នៅរាជធានីភ្នំពេញ។ ទីធ្លា មានចំណង់ចំណូលចិត្តស្រឡាញ់សិល្បៈវប្បធម៌ជនជាតិដើមពូនង ហើយមានទេពកោសល្យក្នុងការរាំ ច្រៀង សរសេរចម្រៀងជាភាសាជនជាតិពូនងនិងភាសាខ្មែរផងដែរ។ ទីធ្លា ស្នើសុំអាហារូបករណ៍សិក្សាបរិញ្ញាបត្រអក្សរសាស្រ្តអង់គ្លេស ដើម្បីមានសមត្ថភាពប្រើប្រាស់ភាសាក្នុងការនិយាយ បង្ហាញនិងថែរក្សាសិល្បៈវប្បធម៌របស់ខ្លួន ជាពិសេសផ្សព្វផ្សាយសិល្បៈវប្បធម៌របស់ខ្លួនទៅកាន់ភ្ញៀវបរទេសដែលមកទស្សនាក្នុងតំបន់និងចង់ស្វែងយល់ពីសិល្បៈវប្បធម៌ជនជាតិ។

យូ សុវណ្ណារឹទ្ធិ

យូ សុវណ្ណារិទ្ធិ មានទីកន្លែងកំណើតនៅខេត្តកណ្តាលហើយសព្វថ្ងៃរស់នៅរាជធានីភ្នំពេញ។ សុវណ្ណារិទ្ធិ ចូលចិត្តគូរនិងស្រមើស្រមៃរូបភាព ចូលចិត្តការថត ភាពច្នៃប្រតិដ្ឋ និងការតែងនិពន្ធ។ សព្វថ្ងៃ សុវណ្ណារិទ្ធិ ជានិស្សិតនៃដេប៉ាតឺម៉ង់ប្រព័ន្ធផ្សព្វផ្សាយនិងសារគមនាគមន៍ និងជាបុគ្គលិកបម្រើការនៅស្ថាប័នមួយជាអ្នកធ្វើគំនូរជីវចល។ សុវណ្ណារិទ្ធិ ស្នើសុំអាហារូបករណ៍បន្តសិក្សាបរិញ្ញាបត្រជំនាញគ្រប់គ្រងនិងសារព័ត៌មាន ព្រោះមានចក្ខុវិស័យនិងគោលដៅ ចង់បង្កើន និងបង្កើតស្នាដៃភាពយន្តថ្មីៗដើម្បីជួយលើកស្ទួយវិស័យសិល្បៈភាពយន្តនៅកម្ពុជា ដោយមិនត្រឹមតែបង្កើតជាសាច់រឿងដែលមានស្តង់ដារ តែបង្កប់អត្ថន័យនិងការអប់រំនៅក្នុងនោះផងដែរ។

“I am always passionate to attend scholarship meetings because I can learn new things, build my self-confidence, and strengthen the relationships with my friends”_ KHEM Sok Srey Mean, Painting student

“My speaking skills and self-confidence have improved very much through the trainings and workshops by CLA.”_SGNOUN Kavey Sereyroth, Pin student

“I am more confident to share my ideas and am motivated to join educational events to improve both my general and artistic knowledge and skills”_EL Huyno, Painting student